ROSALÍA

estiven na túa casa
e as fiestras estaban fechadas

os pandeiros mergullados
facían ondas coas ferreñas

estiven na túa casa
de romería

da túa boca saían contos
peixes engaiolados
desexando voltar ao río

escapaban entre as pedras do muro
e cantaban ás mozas
que bailaban no xardín

os gaiteiros anegaban o fol
coa auga

as muiñeiras estoupaban co rebulir
das ondas


estiven na túa casa e o mar
estaba dentro